 | | |
| | |
|
Spaces home  飛び立つだPhotosProfileFriendsMore |  Tools   |
飛び立つだ目指したのは 青い 青い あの空
|
||||||||||||||||||||||||||||||||||||||
|
August 13 夜…… 宜家係凌晨三点几，每日都好中意呢嘅时候，夜阑人静，冇咗早上嘅喧哗，我嘅空间，有空调声，滴水声，键盘敲打声，一切嚟得多么宁静~感受自己嘅存在，捻下自己早上捻唔到嘅嘢~每当呢个时候，思绪特别多波澜，好多突如其来嘅想法，因为静，所以特别醒~虽然有啲眼瞓，不过都想写埋呢篇咁无聊嘅嘢~因为，凌晨，係真正属于我嘅时间~特别享受呢种凌晨嘅静，静得优雅~静得舒服~净得我係度捻紧你~
夜妈妈，我又捻起啲嘢……我有一个同学，佢平时都认为自己颇为知深入了解自己认为已经了解嘅嘢，每逢吹水都会显得自己好熟果方面，即使每个人都知道佢係错嘅……同时，佢都啲自大、自恋，但係，佢竟然係个blog度写，佢好唔中意呢种人，成日扮晒自己识好多嘢、自恋狂、觉得其他人点都唔及自己……不过，佢係啲咁嘅人……佢话过自己脾气好臭，好对唔住自己身边嘅好朋友……不过，佢成日都乱发脾气……世界上，就係有咁多明知自己有严重缺点，而且承认自己有缺点，但係到头来一啲都唔改嘅人……点解呢？係乜嘢做成呢种咁嘅心理……哈哈~每次见到佢，觉得有啲厌恶之外，仲觉得有少少好笑……人，就係如此滑稽~我係，你係，佢都係~究竟係唔了解自己先会咁样，定係太了解自己先会咁呢……
今日坐车，上嚟两父子，个仔三四岁，左摇右摆咁样上车，行过我面前，我忍唔住要让位……佢爸爸攞住袋鱼仔，听住歌，跟住佢叫个仔同我讲多谢，我戴住耳机，听唔到，对住佢笑左下……跟住个仔扭计，要爸爸抱住坐，阿爸二话没说，就抱住个仔坐，袋鱼摆係旁边，个仔后来瞓着咗，係阿爸嘅怀抱里面好幸福、好舒服咁瞓着坐……我唔记得我有冇係阿爸嘅怀抱里面瞓过，我捻，应该有，因为我有一个好爸爸，虽然细个果阵阿爸成日唔係我身边，但係阿爸好锡我……我仲记得，好细个果阵有一次去人哋屋企拜年，果度有只“了哥”，跟住有个叔问我，呢只係咩啊，我答：“係了哥爸爸！”，“点解係了哥爸爸啊？”，“因为佢有两撇须咯”，“你第日大个咗想做咩啊？”，“想做爸爸！”。呢段经典嘅对话，俾阿爸笑到宜家，自己捻起都觉得好笑，点解会答想做爸爸呢……不过阿爸的而且确树立咗一个好爸爸嘅形象俾我，假如第日有机会，我都要做个好爸爸~哈哈~
果然，宁静嘅夜，我嘅思绪並不宁静~有空做下回忆，唔错啊~哈哈~果然飞蝗係唔多正常嘅~ July 26 广州游第一团！ 7.24发起咗广州深度游第一团，要将广州嘅重点拍摄在案。虽然，呢个提议被好多人话无聊，话浪费时间，话我好得闲，但係我话你知，我话知你~我做嘅嘢绝对唔係浪费时间，绝对唔无聊！因为我爱广州！拍拖无聊你都去拍，点解！？因为你爱佢先同佢拍拖咋嘛~因为我爱佢，我先想用影像记录广州最美嘅一面，无论係老城区或者係新街道，都有独特嘅广州魅力，可能我影嘅相未必有美感，未必有味道，未必符合所有人嘅口味，未必可以反映晒所有嘢出嚟，因为我水平有限，时间有限，我净系想用我自己嘅视角、我自己嘅思路讲俾大家听，陪住我哋成长嘅广州係长什么样子的~她有多美~当我捻到我身为一个广州人，竟然广州大片地方都未去过，只係屈係自己嘅一个小小生活圈子里面，係唔够噶，我想出去睇下广州有几大，广州有几靓！我爱你！！！！
第一团很成功，虽然只有以为团友，阿wing，两条粉肠行到只屐咁……七个钟！足足七个钟！下午三点未到行到晚黑十点！本嚟我係打算自己一个人行晒，点知会有人响应同支持，阿wing唔洗讲啦，仲有小明啦，佢话第二团加入！fish姐严重支持，不过佢有职务在身加上有另一个出游计划，只可以有心无力啦。狮子啦，佢好支持我~果然係我背后嘅女人~佢话出团荔湾就叫埋佢~一个假期游广州，少啲毅力都唔掂，我信我得嘅，身为广州深度游嘅团长兼团员，第一团都捱得过，难道会怕第二团吗？跟住奉送我觉得影得最靓嘅相，虽然相册里面有，不过唔係张张都影得咁好，一张好嘅相係要时间同心机的~希望大家都中意呢几张啦~
June 29 我，长大了吗？今日同个大学同Q聊，佢经常性搵我做心理辅导，我唔知几时又担当起心理辅导员嘅角色，今日倾到嘅话题就喺成熟。讲起呢个话题嘅原因就喺，佢觉得自己唔够成熟，好多嘢都要屋企人担心，佢想好似我同我个室友咁样，思想成熟，可以唔洗令到屋企人咁担心，可以做个更加有用嘅人。
呢个话题上，其实我觉得我唔够资格讲（虽然都讲咗成个钟），我反复思考，我真喺长大咗咩？生理上毋庸置疑，四肢健全，营养过盛，可以话，长得有啲过分大咗少少啦……但喺，我仲喺果个成日要阿爸阿妈劳心嘅阿仔，可能我喺佢哋眼里面永远都喺咁大个，所以我透过佢哋只眼喺睇唔出我自己长大咗未。
宜家同以前有咩分别呢？做人圆滑咗？细细个都识得卖口乖啦，大个就仲叻添……所以都唔喺判定标准……处事灵巧咗？细个做嘢唔知后果喺咩，做咗先算；大个做嘢知道后果，但偏偏又会不理后果咁去做。哈哈~咁样长大同唔长大有咩分别？细个果阵想长大，老咗果阵想回到从前，咁样喺咪后悔长大嘅表现？
青春不复再来，面对住就嚟到嘅21岁生日，回首过去21年，我长大吗？有，我确实知道自己长大啦……但喺，当你确信自己长大嘅时候，其实你还很幼稚……人，即使到死，都还在长大中……路，还很远，但终点很近，有时只有一步之遥……有人中意追求终点，但我中意享受路上的乐趣，果种写意，果种快乐，果种温暖，喺终点永远都俾唔到我嘅……亲情，友情，爱情，当你完全懂得嘅时候，或者，已经到咗终点……人，长大，唔止为咗认识呢三样嘢，仲要去保护佢哋，珍惜佢哋，喺到达终点之前，可以搵齐呢三样，并且一个不失，人生，还有遗憾么？多共亲人相聚，多跟朋友交心，多与恋人说“我爱你”，该爱嘅时候就爱，长大就应该具备这种“机能”，世上冇嘢可以阻止你去爱你嘅亲人，爱你嘅朋友，爱你嘅恋人……
我，觉得我长大了，确实，长大了；但，还在长大，直到我达到终点为止。 June 15 也许，那里没有病痛寻日去探望久卧病床嘅姑妈，明显比一个几月前嘅佢又消瘦咗好多好多，每一次去探佢，一次比一次嘅情况差。一个星期有几次差啲透唔过气，寻日去睇佢嘅时候，佢每一次呼吸都显得格外费力，有时会有气促嘅情况出现，成个人瘦到连透气嘅力都冇，讲嘢要深呼吸一啖气先可以讲几个字，咁样嘅情况真喺令人心痛，又令我回想起我表哥果阵嘅情况，点解两母子可以黑成咁……都喺同一种病，都喺严重到冇得医……姑妈好坚强，真喺十分坚强，顶住个仔离自己而去嘅痛心，顶住病魔嘅折磨，足足捱咗年几，80%嘅时间喺医院度过，果种辛苦法真喺旁人难以承受……睇到佢宜家个样，就好似当时沈殿霞坐轮椅出嚟领奖果阵嘅样，完全喺变到皮包骨，手脚肌肉萎缩，连行路都办法……屋企人个个睇到都觉得心痛，但又无能为力，可以做嘅就喺佢要乜我哋就满足佢，等佢个心好受啲……睇住爸爸、伯爷仲有细姑妈日日夜夜帮佢煮饭同埋照顾佢，真喺好辛苦，我要返学，帮唔到咩手，顶多星期六日翻屋企嘅话，就帮手送下汤同饭，间唔中同阿嫲佢探下佢。阿嫲都好坚强，睇住个女病成咁，一切都睇得好开，寻日见到阿嫲拖住姑妈只手，我差啲就喊咗出嚟……阿嫲话姑妈只手好冻，不断咁拖住佢只手，一副好凝重嘅神情……我知阿嫲好想喊，但喺佢冇喺姑妈面前落过一滴眼泪……表哥走咗之后，阿嫲仲安慰我叫我唔好喊，但喺我冇办法控制到，有边个可以唔伤心……仲记得表哥话过，如果考到同一间大学，第日毕业就一齐出嚟开公司……我考到啦……但喺……你已经唔喺度……睇住好锡我嘅表哥走咗，宜家睇住同样好锡我嘅姑妈就嚟要走，心里面的确唔好受，但事实已经摆喺眼前，除咗接受我哋仲可以点样，只可以希望佢走嘅时候唔好咁痛苦，好舒服咁去，咁我哋已经喺好满足噶啦。同时希望佢去嘅世界冇任何病痛，可以活得更好，我哋都别无所求。June 08 L for Love·L for Lies 今晚终于睇咗期待已久嘅“我的最爱”，有前两作嘅基础，呢出嘢一定唔会差得去边嘅，虽然剧情有啲预料之中，但喺都有预料之外嘅嘢……不过就喺唔明，点解Stephy用独家试爱开始叫阿宝叫到第三集，但喺每个故事又唔相连，剧情都唔喺十分记得啦，独家试爱讲一对本来好好嘅情侣被第三者有意无意地破坏咗，最后和好收场，尚算令人觉得恋爱还是有点前景……十分爱，由开头睇落嚟呢，觉得方力申都冇乜嘢，点知最后……竟然方力申喺坏人，玩弄Stephy感情，竟然Stephy仲傻兮兮咁以为旧情可以复炽，喺Stephy未知道真相之前就完场，令人无限遐想最终结局……到咗最后一部，仲离谱，方力申一开始就喺衰人添，一个有前科嘅骗子，n年前暗恋过Stephy，虽然n年后撞翻，但最后竟然……俾人队林咗……很黄很暴力嘅一部戏……黄就黄在胡清蓝同MIKI喺铺头度做埋晒爱抚呢啲嘢……由于很黄很暴力，所以内地影院都冇得上“我的最爱”，我顶……
互相猜疑，互相欺诈，再到互相信任，坚定相爱，故事模式来来去去就围绕呢几样，故事源于生活，形形色色，都喺生活中嘅点点滴滴，让大家去思考到底要点样爱，点样去进攻，点样去防守，呢部戏如果撇除剧情，就好似一幅情爱浮世绘，里面嘅故事貌似离大家好远，但又确切发生喺我哋身边……睇完呢三部嘢，俾我嘅感觉就喺，拍拖好危险，唔知边个呃紧边个，唔知几时真几时假，爱恨之间就那么一线……引用里面一句话“好朋友喺永远唔会分开”，睇嚟好朋友要多交，女朋友就尽量少交……咁睇嚟要出家啦我……如果拖一定要咁样拍，咁就难顶咯……但喺貌似潮流就喜欢咁样…… 一晚睇咗两次“我的最爱”，将啲比较有feel嘅、比较经典嘅、比较搞笑嘅台词收录落嚟，同大家一齐分享个中乐趣。 1. 方力申（阿强）：Baby啊，唔好嗌咁多热气嘢 肥婆（骑呢琼）：知啦，傻猪猪~咁你想食乜嘢啊？ 阿强：我想食咗你啊，傻猪猪~ 路人甲：唔洗食啦，食几多都唔够呕啊…… 2. 阿宝（Stephy）： 佢同我讲，我喺佢嘅“我的最爱”，但原来最诚实嘅说话，喺最虚伪嘅大话嚟噶……佢嘅“我的最爱”根本唔喺我……我就好似佢电脑一样，“我的最爱”永远都有好多，中意嘅就Keep，唔中意嘅就Delete…… 3. 蚊（唐宁）：我同你讲啊，我食硬你啊，你都硬食我噶！ 4. 敏（杨爱瑾）：打电话，Call的士，快啲翻屋企！ 风：我唔走啊，我想同你一齐啊…… 敏：我宜家咪同你一齐咯……不过唔喺今晚之嘛 风：敏啊，我唔想做你后备情人啊，我想做你正选啊……我啱同阿蚊分咗手啦……我两个喺埋一齐 敏：你搞清楚好喔！我应承做你后备啫，唔喺正选啊…… 风：敏啊，我知你喺中意我噶，点解唔可以喺咪一齐啫…… 敏：喺Timing啊！感情喺有Timing噶！我识你嘅timing只可以做后备，呢个timing喺唔会变噶…… 风：你喺中意我噶，如果唔喺你点解会出嚟………… 敏：你放手啊！我出嚟话你听啊，我今晚应承咗阿伟嫁俾佢…… 5. 敏：点解你要对我咁好啊？ 风：因为我唔识点样对你唔好咯…… 6. 风：我真喺好中意你噶 敏：中意……同可唔可以喺埋一齐……已经喺两件好唔同嘅事了……其实我哋大家只可以当大家喺后备，冇可能喺正选，就好似落场踢波咁呃，做后备嘅，永远喺球场外围做热身，睇人踢波，时间好快就会过，但喺正选……真喺要上场，好大压力嗝……就喺大家当大家喺后备，好多嘢得过且过，如果真喺拍拖嘅话，咩缺点都会见到晒，大家未必顶得顺，我结婚噶啦，不如我哋大家净喺大家一齐开心嘅嘢啊，唔开心嘅……忘记佢…… 7. 蚊：风，我好挂住你啊…… 风：我都喺啊…… 蚊：我知我以前对你好差，但我唔想噶，我喺一个唔识得爱人嘅人，或者喺因为……从来都冇人爱过我，我成日都发你脾气，我喺想你了解我呀……我有好多嘢都好想同你呀……但喺我见到你……我唔知……我唔知点讲呀…… 风：你慢慢讲啦，只要你肯讲，我都肯听…… 蚊：我唔喺话想check你电话啊，但喺同买衫唱K一样，呢啲喺我嗜好……我希望你身边嘅女人全部都喺肥婆、猪排同师奶……我嚟M果阵时，真喺可以大晒，可以乱发脾气，但喺一个月你都喺忍我几日啫……我发烂渣……嘅时候同你讲，话叫你唔好搵我，永远都喺假噶，你一定要嚟搵翻我啊……我发脾气同你讲嘅嘢，千祈唔好当真啊，我话唔好，啫喺好，我话唔要啫喺要，我话唔想啫喺想啊……你明唔明啊……我平时喺街走咗去嘅时候，你一定要追翻我啊，我唔想喺玻璃同埋倒后镜果度睇下你有冇跟住喺我后面啊……我成日都话减肥，其实我最想听到你同我讲：“你一啲都唔肥，我中意咪得咯”……我冇安全感，喺因为我太爱你，我唔可以冇咗你啊……阿风啊，你唔好dum低我啦…… 风：有冇人同你讲过，爱一个人喺讲timing嗝……我同你喺唔啱嘅timing喺埋一齐，唔work嗝……你值得有个更加爱你嘅人……其实，我见到你宜家咁反而我仲开心，因为你变咗啦，你将来一定会搵到一个你又好爱佢，佢又好爱你嘅人…… 蚊：风啊…… 风：但我冇咁好彩，我唔喺呢个人啊…… 蚊：风啊，唔好啊……唔好啊…… 风：真正爱一个人，应该俾佢自由嗝，唔喺要去完全咁占有佢，喺个朋友啱啱教识我嗝……我同你都应该俾对方更加多嘅自由，因为我哋都爱对方啊嘛……傻妹啊唔好喊啦，我哋喺唔会分开噶，因为好朋友喺永远唔会分开噶嘛…… 8. 琪琪：他是个骗子（国语），佢唔厄你，佢食屎啊~？ 阿宝：收声啊八婆！我喺咪前世杀咗你全家啊，点解你喺都要抢走晒我啲嘢噶！？ 琪琪：抢是你说的，我认为这是争取，好的东西，就是要自己争取，我不觉得我做错什么~ 阿宝：我喺你好朋友啊！ 琪琪：那你不是更应该体谅我吗？可是，我从来没把你当成我的朋友，所以，我不用考虑你的感受吧~ 9.
鸡蛋仔老板：同女朋友嗌交定呢~宜家啲女仔又中意嬲又唔讲，等啲麻甩佬呢左估右估，咁先算紧张佢喔，今晚会冻，早啲返去氹翻佢啊，say声“Sorry，I love you”，都喺一句啫，有时有啲唔讲，丢淡咗就冇机会噶啦。
一句“我的最爱”喺几咁容易讲出口，但喺又有几多人嘅最爱喺唯一呢…… 一句“感情喺有timing噶”解救几多为情所困嘅人…… 一个正选与后备嘅比喻，令好多暧昧关系得以诠释 中意同爱就喺相差那么几笔，距离却是那么的远 爱与自由兼得，又有几个可以做到 真亦假时假亦真，你睇到嘅未必喺真，真嘅你又未必睇到 点解感情就永远都喺咁复杂呢……究竟喺感情本身复杂，定喺我哋将感情复杂化呢……剪不断，果然会喺理还乱啊……
|
|||||||||||||||||||||||||||||||||||||
|
|
Invite as friend